Sunday, September 11, 2011

Պատերազմների համակարգված պատմություն


Այսօր մի հետաքրքիր կայք գտա, որ ցանկանում եմ ներկայացնել: Պատմության ընթացքում բազմաթիվ պատերազմներ են տեղի ունեցել, որոնց մասին բոլոր տեղեկությունների համատեղելը դժվար գործ է:
Conflict history կայք էջը շատ հետաքրքիր աշխատանք է իրականացրել: Կայքում տեղադրված է բոլոր տարեթվերը, ու դրանք ընտրելով, Google Map-ի վրա հայտնվում են այդ ժամանակահատվածում տեղի ունեցած պատերազմները:
Այս կայքը մի քանի ժամ ինձ զբաղեցրեց, հույսով, որ ձեզ համար էլ օգտավետ լինի:

Thursday, September 01, 2011

Իրանի իշխանությունները հանդիպել են Սիրիայի ընդդիմադիրների հետ


Ֆրանսիական Le Figaro օրաթերթի հաղորդմամբ՝ Իրանի իշխանությունների ներկայացուցիչները եվրոպական երկրներից մեկում հանդիպում են կազմակերպել Սիրիայի ընդդիմադիր ուժերի ղեկավարների հետ:

Օրաթերթի փոխանցմամբ, իրանական կողմը սիրիացի ընդդիմադիրների հետ երկու ուղղությամբ քննարկումներ են իրականացրել. նախ՝ արդյո՞ք Սիրիայի ընդդիմությունը երկրում բարեկարգումներ իրականանալուց հետո հնարավորություն կունենա երկրի ղեկավարությունը պահել իր ձեռքում, և երկրորդ՝ Բաշար Ասադի իշխանությունից հեռանալը լավագույն արդյունքը կարող է լինել:

Le Figaro-ի մատուցմամբ՝ Իրանի իշխանությունների նմանօրինակ պահվածքը նաև մտահոգել է Սիրիայի իշխանություններին, որովհետև Իրանը տարածաշրջանում Սիրիայի լավագույն դաշնակիցն էր համարվում:

Արթին Առաքելյան
«Առաջին» Լրատվական

Սիրիայի իշխանություններին ցուցաբերած Իրանի բացարձակ պաշտպանությունը սխալ էր. Իրանի ազգային անվտանգության խորհրդի անդամ


Իրանի ազգային անվտանգության խորհրդի անդամ, խորհրդարանի պատգամավոր Ահմադ Ավային, իրանական Khabar օրաթերթի հետ ունեցած հարցազրույցում, անդրադառնալով վերջին շրջանում տարածաշրջանում տեղի ունեցած փոփոխություններին, քննադատել է Իրանի արտաքին քաղաքականությունն ու դիվանագիտությունը:

Ըստ Ավայիի՝ «Սիրիայի ու տարածաշրջանի այլ երկրների ընդհանրությունները հենց ազատ ընտրությունների ու ազատության բացակայությունն է: Սիրիան տարածաշրջանի այլ երկրներից տարբերվում է իր անկախությամբ: Անգամ Խորհրդային Միության տիրապետության ժամանակ, Սիրիան նրանց դաշնակիցն էր, ոչ թե կախյալը: Բայց դժբախտաբար Սիրիայի իշխանությունները բարեկարգումներ իրականացնելու հարցում շատ ուշացան, սկզբում ժողովուրդը բարեկարգումներ էր պահանջում, ու եթե իշխանությունները լսեին ժողովրդի բողոքի ձայնը, այսօր այս վիճակին չէին մատնվի:

Իրականությունն այն է, որ մեր կողմից ցուցաբերված բացարձակ պաշտպանությունը սխալ էր: Սիրիայում բողոքի դուրս եկած ժողովրդի մեծամասնությունը հավատացյալ մարդիկ էին, ու բողոքի ցույցերը ինքնաբուխ էին, թեև Արևմուտքն ու ԱՄՆ-ը ցուցարարներին դրդելով ու նրանց զինամթերք տրամադրելով շեղեցին ցույցերի ընթացքը»:

Ահմադ Ավային, վերջում անդրադառնալով Լիբիայի անցուդարձերին, նշել է, որ իրանական կողմը ցանկություն էր հայտնել աջակցել Լիբիայի հեղափոխականներին, բայց իրենք հրաժարվել են օգտվել մեր օգնություններից, հետևաբար այդ խնդրում Իրանի ԱԳ նախարարությունը ճիշտ դիրքորոշում է որդեգրել:

Արթին Առաքելյան
«Առաջին» Լրատվական

Իրանում փորձել են կոտրել GMAIL ծառայության կայքը


Google ընկերության անվտանգության կայքը հաղորդել է, որ օրեր առաջ Իրանից փորձել են կոտրել GMAIL ծառայության կայքն ու ձեռք բերել իրանցի հասցեատերերի մուտքագրերը:

Ընկերության փոխանցմամբ՝ հաքերները փորձել են իրենց պատրաստած կոդերը տեղադրել ծառայության կայքի ու օգտատերերի հաղորդակցության միջև, որից հետո հնարավորություն կստեղծվեր ձեռք բերել իրանցի օգտատերերի գաղտնագրերը: Այդ ընթացքում մի իրանցի օգտատեր, դա նկատելով, տեղեկացրել է Google ընկերությանը:

Բրիտանական Guardian օրաթերթը, այս լուրը հրապարակելով, նշել է, որ հավանաբար Իրանի իշխանությունները փորձում են ձեռք բերել իրանական ընդդիմադիր ուժերի այն ակտիվիստների գաղտնագրերը, որոնք վստահել են GMAIL ծառայությանը:

Արթին Առաքելյան
«Առաջին» Լրատվական

Լիբիայի անցումային խորհրդի ղեկավարը հատուկ բարևներ է ուղարկել Այաթոլլահ Խամենեիին


Իրանական Siasatema լրատվական կայքի հաղորդմամբ՝ Իրանի ԱԳ նախարար Ալի Աքբար Սալեհին Լիբիայի անցումային խորհրդի ղեկավար Մուստաֆա Աբդոլջալիլի հետ ունեցած հեռախոսազրույցի ընթացքում շնորհավորել է Լիբիայի ժողովրդի ձեռք բերած հաղթանակներն ու հույս հայտնել, որ մոտ ժամանակներս Իրանի և Լիբիայի հարաբերությունները ավելի կսերտանան:

Հիշյալ զրույցի ընթացքում Աբդոլջալիլը նույնպես շնորհակալություն է հայտնել դժվար պայմաններում Լիբիայի ժողովրդին ցուցաբերած Իրանի մարդասիրական աջակցության համար և հատուկ բարևներ հղել Իրանի առաջնորդ Այաթոլլահ Խամենեին:

Իրանական կայքի փոխանցմամբ՝ լիբիացի պաշտոնյան հույս է հայտնել, որ Սալեհին շուտով կայցելի Լիբիա, փոխադարձաբար՝ Իրանի ԱԳ նախարարն էլ Մուստաֆա Աբդոլջալիլին Թեհրան է հրավիրել:

Արթին Առաքելյան
«Առաջին» Լրատվական

Հրեաները մարդկության ամենավատ թշնամիներն են. իրանցի կրոնապետ


Իրանական Fars գործակալության հաղորդմամբ՝ Իրանի Թաբաս քաղաքի կրոնապետ Հոջաթոլիսլամ Էբրահիմ Մոհաջերիանը հավաքական նամազի ընթացքում ունեցած իր ելույթում հայտարարել է. «Թշնամուն ճանաչելու համար պարտադիր պիտի ուշադիր ու արթուն լինել: Աստված Ղուրանում ասել է՝ սատանայից հետո մարդկության ամենավատ ու ոխերիմ թշնամին հրեաներն ու սիոնիստներն են»։

Հիշեցնենք, որ օրեր առաջ էլ Իրանի նախագահ Մահմուդ Ահմադինեժադը մի ելույթի ընթացքում հայտարարել էր, որ Իրանը լուրջ պայքար է տանում Իսրայելի ոչնչացման համար, և մինչև նպատակի իրագործումը դա կմնա Իրանի արտաքին քաղաքականության ուշադրության կենտրոնում:

Արթին Առաքելյան
«Առաջին» Լրատվական

Լարիջանին իր թուրք գործընկերոջը Թեհրան է հրավիրել


Իրանական Aran լրատվական կայքի հաղորդմամբ՝ Իրանի խորհրդարանի նախագահ Ալի Լարիջանին Թուրքիայի խորհրդարանի նախագահ Ջամիլ Չիչեքի հետ հեռախոսազրույցի ընթացքում նրան մի շարք խորհրդակցությունների համար Թեհրան է հրավիրել:

Լարիջանին, շնորհավորելով իր թուրք գործընկերոջ իսլամական Ֆեթր տոնը, անդրադարձել է Պաղեստինի հարցի կարգավորմանն ու հայտարարել. «Իսլամական երկրների խորհրդարանները պետք է աչալուրջ լինեն Պաղեստինի ժողովրդի իրավունքները վերականգնելու հարցում: Իրանի խորհրդարանը շուտով կկազմակերպի Պաղեստինի ժողովրդի պաշտպանության 5-րդ համաժողովը»։

Հիշեցնենք, որ վերջին ամիսներին Սիրիայում բռնկված ժողովրդական հուզումների պատճառով, երբ Թուրքիայի իշխանությունները ընդդիմադիր դիրքորոշում որդեգրեցին Բաշար Ալ-Ասադի վարչակարգի հանդեպ, Իրանի և Թուրքիայի հարաբերությունները խաթարվել են:

Արթին Առաքելյան
«Առաջին» Լրատվական

Իրանը 20%-ից բարձր բաղադրության հարստացված ուրան չի արտադրի


Իրանի միջուկային էներգիայի կազմակերպության ղեկավար Ֆերեյդուն Աբասին իրանական IRNA գործակալության հետ զրույցում, անդրադառնալով երկրի միջուկային աշխատանքների նոր ձեռքբերումներին, հայտարարել է, որ երկրի կարիքներից ավելի 20% բաղադրության հարստացված ուրան են արտադրել:

Աբասին մեծ քանակությամբ հարստացված ուրան արտադրելու գլխավոր պատճառներից է համարել ատոմակայանում հավանական անսարքությունների առաջացումն ու ապագայում կառուցվելիք նոր ատոմակայանների համար վառելանյութի ապահովումը:

Ֆերեյդուն Աբասին նաև նշել է, որ այսուհետ Իրանը 3.5%-անոց ուրանը կարտադրի Նաթանզ ատոմակայանում, իսկ 20%-անոցը ուրանը՝ Ղոմ քաղաքին մոտակա Ֆորդո կենտրոնում: Ըստ իրանցի պաշտոնյայի՝ այդ տեղափոխությունը կատարվել է Նաթանզի ատոմակայանի անապահովության պատճառով:

IRNA-ի փոխանցմամբ՝ Իրանի միջուկային էներգիայի կազմակերպության ղեկավարը հավելել է. «20% հարստացված ուրանի արտադրությունը կանգ չի առնելու, բայց Իրանը 20%-ից բարձր բաղադրության հարստացված ուրան արտադրելու ծրագիր չունի»։

Արթին Առաքելյան
«Առաջին» Լրատվական

Եթե Մաշային սահմաններն անցնի, կհայտնվի առաջնորդի սրի դեմ. Մոհսեն Ֆուլադի


Իրանական Fars գործակալության հաղորդմամբ՝ Իրանի իշխանությունների աշխատանքները համակարգող Մոհսեն Ֆուլադին Վարամին քաղաքում հայտարարել է. «Հոկտեմբեր ամսին նոր դավադրություն է սպասվում, որի 70%-ը իրականանալու է մամուլի միջոցով: Ոմանք նախագահի գրասենյակի ղեկավար Էսֆանդյար Ռահիմ Մաշայիին են ներկայացնում որպես ծանրակշիռ անձնավորություն, բայց նա այն կշիռը չունի, որ կարողանա կանգնել իսլամական համակարգի ու հոգևոր առաջնորդի դեմ, մեր համակարգի առանցքը Այաթոլլահ Խամենեին է: Եթե նա սահմանները անցնի ու մեզ պարտադրի դիմադրել, ինքը կհայտնվի առաջնորդի սրի դիմաց»։

Նման սպառնալիքներ՝ ուղղված նախագահի գրասենյակի ղեկավար Ռահիմ Մաշայիի դեմ, հրապարակվում են ոչ առաջին անգամ. անցյալ շաբաթվա ընթացքում բազմաթիվ նմանօրինակ սպառնալիքներ են հնչել Իրանի առաջնորդի կողմնակիցների կողմից: Օրեր առաջ կրոնական հանրահայտ քարոզիչ Մանսուր Արզին էլ հրապարակավ հայտարարել էր, որ այս պահին Ռահիմ Մաշային թաքնվել է, և ով կարողանա սպանել նրան, ինքն անձամբ նրա փոխարեն տուգանք կվճարի:

Արթին Առաքելյան
«Առաջին» Լրատվական

«Ահմադինեժադի թիմակիցները երկրի խոշոր նախագծերը պատանդ են վերցրել». Javan օրաթերթ


Իրանի պահակազորին պատկանող Javan օրաթերթը, անդրադառնալով Իրանի խորհրդարանի առաջիկա ընտրություններին, հայտարարել է, թե նախագահ Ահմադինեժադի թիմակիցները, խորհրդարանական ընտրություններում հաղթանակ ապահովելու նպատակով, երկրի խոշոր նախագծերը պատանդ են վերցրել ու սպառնացել են, որ եթե իրենց թեկնածուները դուրս մնան կամ չհաղթեն ընտրություններում, այնպես կանեն, որ այդ նախագծերը արդյունքի չհասնեն:

Javan-ի փոխանցմամբ՝ Ահմադինեժադի թիմակիցները փորձում են նախքան ընտրությունները որոշ տնտեսական նախագծերի շուտափույթ իրականացմամբ հասարակության քվեն շեղել դեպի իրենց ներկայացրած թեկնածուների կողմը:

Հիշեցնենք, որ նույն օրաթերթը օրեր առաջ հրապարակել էր նաև այն մասին, որ Ահմադինեժադի թիմակիցները փորձում են նվազագույնի հասցնել երկրի առաջնորդ Այաթոլլահ Խամենեիի լիազորություններն ու նոր սահմանադրության շուրջ հանրաքվե անցկացնել երկրում:

Արթին Առաքելյան
«Առաջին» Լրատվական

Պոռնո-կայքեր այցելելու հաճախությամբ Իրանը 182 երկրների մեջ առաջին տեղում է


Իրանական Fars գործակալության հաղորդմամբ՝ Իրանի պահակազորի կիբերբանակի շտաբը հայտարարել է, որ պոռնո-կայքեր այցելելու հարցում Իրանը 182 երկրների մեջ առաջին տեղն է գրավել: Իրանի Ֆարս նահանգի պահակազորի տեղեկատվական բաժնի տեղակալ Էբրահիմ Բայանին հայտարարել է, որ պահակազորի վերջին ուսումնասիրությունների արդյունքում՝ պոռնո-կայքեր այցելելու հաճախությամբ Թեհրանը առաջին, Եազդը՝ երկրորդ, Սպահանը՝ երրորդ, իսկ Շիրազը՝ վեցերորդ տեղում են գտնվում: Հարկ է նշել, որ առաջին անգամ են պաշտոնապես նմանօրինակ ուսումնասիրության արդյունքներ հրապարակվում Իրանում: Հատկանշական է, որ ժամեր անց Fars գործակալությունը հիշյալ լուրը հանեց իր կայքից:

Արթին Առաքելյան
«Առաջին» Լրատվական

Friday, August 26, 2011

1500 տարի հետո Իրանի, Ռուսաստանի ու Չինաստանի ժողովուրդները վերանալու են


Բրիտանական The Economist պարբերականը իր վերջին ուսումնասիրությունների արդյունքում, պարզաբանել է, թե որ երկրները առաջիկա հազարամյակում, ծննդաբերության անմխիթար վիճակի պատճառով ամբողջությամբ վերանալու են:

Պարբերականը ՄԱԿ-ի՝ ծննդաբերության վերաբերյալ հետազոտությունների տվյալների հիման վրա (կատարվել է ավելի քան 83 երկրներում) նշում է, որ ասիական երկրներում կանայք ու աղջիկները «դանդաղորեն հեռանում» են ամուսնական կյանքից: Օրինակ՝ Հոնգ Կոնգի մասին ուսումնասիրությունները պարզում են, որ 25 սերունդ հետո այդ երկրում միայն 1 կին է մնալու, ու վերջ է դրվելու այդ երկրի բնակչությանը:

Economist-ը այս բոլոր դրդապատճառներից է համարում այն, որ ասիական երկրներում, ինչպիսին են Չինաստանն ու Հնդկաստանը, աճել է այն աբորտների թիվը, որոնց պտուղը աղջիկ է:

Ուսումնասիրության արդյունքում պարզվել է, որ առաջիկա 1500 տարիների ընթացքում Իրանի, Ռուսաստանի ու Չինաստանի ժողովուրդները վերանալու են, եթե ծննդաբերության ոլորտում լուրջ բարեփոխումներ չկիրառվեն:

Արթին Առաքելյան
«Առաջին» Լրատվական

Երկու իրանցի լրտեսության մեղադրանքով ձերբակալվել են Թուրքիայում


«Ազատություն» ռ/կ –ի պարսկերեն ծառայության հաղորդմամբ՝ Իրանի՝ երկու ու Թուրքիայի՝ մեկ քաղաքացիներ, Թուրքիա-Նախիջևան սահմանագծում լրտեսության մեղադրանքով ձերբակալվել են՝ Թուրքիայի անվտանգության ծառայությունների կողմից:

CNN Turk հեռուստաընկերության փոխանցմամբ՝ ձերբակալվածները Նախիջևանի սահմանային շրջաններում փորձել են լուսանկարել թուրքական դատախազության ու ազգային անվտանգության կենտրոնի շենքերը, որտեղ էլ ձերբակալվել են:
Մեղադրյալները փոխադրվել են Իգդիրի բանտ ու ժամանակավոր պահվում են այնտեղ: Դեռ չի հրապարակվել ձերբակալվածների ինքնությունը:

Արթին Առաքելյան
«Առաջին» Լրատվական

«Սիրիայի իշխանություններն ու ժողովուրդը պիտի ուշադիր լինեն, ու միմյանց հետ հարցերը լուծեն համերաշխությամբ». Ահմադինեժադ


Իրանական ISNA գործակալության հաղորդմամբ, Իրանի նախագահ Մահմուդ Ահմադինեժադը լիբանանյան Al Menar հեռուստաընկերության հետ ունեցած հարցազրույցում, հայտարարել է. «Ղուդսի ազատագրման գաղափարը երբեք Իրանի արտաքին քաղաքականությունից չի բացակայելու, և ով մարդկայնության գաղափարներին հավատարիմ է, պիտի Իսրայելի ոչնչացման գաղափարին հավատարիմ մնա: Իրանի Իսլամական Հանրապետությունն էլ Իսրայելի ոչնչացումը լրջորեն հետպնդում է»:

Ահմադինեժադը Սիրիայի հետ կապված հարցերին ի պատասխան՝ ասել է. «Արևմուտքը ցանկանում է, որ այն ինչ կատարվեց Լիբիայում, տեղի ունենա նաև Սիրիայում: Նրանց համար փողը, նավթն ու քաղաքական գերակայությունն է կարևոր, հետևաբար Սիրիայի իշխանություններն ու ժողովուրդը ուշադիր պիտի լինեն ու փորձեն միմյանց միջև ծագած խնդիրները լուծել համերաշխությամբ»:

Իրանի նախագահը, Սիրիայի նկատմամբ Թուրքիայի որդեգրած աննախադեպ դիրքորոշման մասին էլ ավելացրել է. «Իրանն իր թուրք բարեկամների հետ միշտ բանակցում է տարածաշրջանային զարգացումների շուրջ, բայց բոլորը պիտի իմանան, որ Արևմուտքի դավադրությունները շատ բարդ են: Նրանց համար Թուրքիան, Սաուդյան Արաբիան, Եգիպտոսը, Իրանն ու Սիրիան կարևոր չեն, ու նրանք չեն ցանկանում, որ տարածաշրջանի երկրները զարգացում արձանագրեն: Ուրեմն բոլոր երկրները պիտի ուշադիր լինեն, որ կարճ ժամկետում որևէ մեկին չօգտագործեն մյուսի դեմ»:

Արթին Առաքելյան
«Առաջին» Լրատվական

«Մենք չենք ցանկանում, որ «Իսլամական Հանրապետությունը» սահմանափակվի միայն Իրանով». Այաթոլլահ Շահրուդի


Իրանական Fars գործակալության հաղորդմամբ՝ Իրանի դատական իշխանության նախկին ղեկավար Այաթոլլահ Հաշեմի Շահրուդին, Իրանի խորհրդարանի «Իսլամական արթնություն» խմբակցության անդամների հետ հանդիպման ընթացքում, գնահատելով նմանօրինակ խմբակցության կյանքի կոչելու փաստը, հայտարարել է. «Իսլամական արթնությանը լուրջ կարևորություն ցուցաբերելն իսլամական համակարգի քաղաքական նպատակներից է եղել:

Իսլամի վերականգնումն աշխարհում, Իրանի Իսլամական Հանրապետության հիմնադիր Իմամ Խոմեյնիի գլխավոր նպատակներից է եղել, ու այսօր մեր համակարգի առաջնահերթ խնդիրներից է համարվում:

Նկատի ունենալով տարածաշրջանային զարգացումներն՝ այսօր մենք այլևս չենք ցանկանում, որ «Իսլամական Հանրապետություն» հասկացությունը սահմանափակվի միայն Իրանով, այլ՝ փորձում ենք իսլամը վերականգնել ամբողջ աշխարհում:

Այսօր տարածաշրջանում Արևմուտքը փորձում է իսլամական մրցակից ստեղծել Իրանի համար, ու դա Թուրքիան է, որը լիբերալ իսլամականության ներկայացուցիչն է համարվում: Ես Իրանի ԱԳ նախարարության սահմանափակումներից տեղյակ չեմ, բայց գիտեմ, որ մեր արտաքին քաղաքականությունը, թուրքերի համեմատ, ավելի թույլ ու կրավորական է տարածաշրջանում: Սակայն, օրինակ, Եգիպտոսի ժողովուրդը, որ դրական մոտեցումներ ունի Իրանի հանդեպ, լավ տրամադրված չէ Թուրքիայի հանդեպ, ու դա պատմական դրդապատճառներ ունի՝ կապված Օսմանյան թագավորության ժամանակաշրջանի հետ: 

Վերջին շրջանում Թուրքիայի ԱԳ նախարար Դավութօղլուն, երբ խոսեց օսմանականության վերակենդանացման մասին, Եգիպտոսի ժողովուրդն ավելի հեռացավ Թուրքիայից:»

Արթին Առաքելյան
«Առաջին» Լրատվական

«2020-ի օլիմպիական խաղերը «կանցկացնենք» ազատ Պաղեստինում ու Եգիպտոսում». Իրանի «Բասիջ» աշխարհազորային ուժերի հրամանատար


Իրանական Fars գործակալության հաղորդմամբ՝ Իրանի «Բասիջ» աշխարհազորային ուժերի գլխավոր հրամանատար Մուհամադ Ռեզա Նաղդին պաղեստինցի մարզիկների հետ հանդիպման ժամանակ հայտարարել է. «Ինչպես Այաթոլլահ Խամենեին է ասել, այսօր սիոնիստները շրջափակված են իսլամական մարտիկներով: Սիոնիստներին հորդորում ենք, որ իրենց տան կահույքը վերցնեն ու իրենց երկրները վերադառնան, թե ոչ՝ պահ է գալու, որ անգամ ճամպրուկները փակելու ժամանակ չեն ունենալու:

Ղուդսի ազատագրումը հաստատ տեղի է ունենալու, դա իսլամական արթնության արդյունքն է լինելու, և բոլորս, Աստծու կամոք, Պաղեստինի ազատագրումը տոնելու ենք միջազգային մարզական մի տոնախմբությամբ, ինչպիսին է օրինակ 2020-ի օլիմպիական խաղերը, որը «կկայացնենք» ազատ Պաղեստինում ու Եգիպտոսում»:

Արթին Առաքելյան
«Առաջին» Լրատվական

Հայաստանը իրանական կրոնական աղանդներին աշխատելու համար թույլտվությո՞ւն է տալիս


Իրանական Tabnak լրատվական կայքի հաղորդմամբ՝ Իրանի անվտանգության ծառայությունները ձերբակալել են իրանական աղանդավորական կազմակերպության և դրա հայաստանյան մասնաճյուղի միջև կապող օղակ հանդիսացող անձնավորությանը:

Կայքի փոխանցմամբ, իրանական «Օղակ» անվանումով կրոնական աղանդավորական շարժումը, որը մեծ թվով անդամներ ունի Իրանում, լուրջ աշխատանքներ է ծավալում նաև Հայաստանի Հանրապետության տարածքում:
Tabnak-ը, մեջբերելով ձերբակալված ղեկավարներից մեկի՝ Թահերիի խոսքերը, հաղորդում է, որ Հայաստանի իշխանություններն ու անվտանգության ծառայությունները տեղյակ են եղել իրենց ծավալած գործունեության մասին ու անգամ իրենց ասել են, որ կարող են ազատորեն աշխատել Հայաստանի ցանկացած վայրում, որտեղ իրենց կտրամադրվի տարածք ու քարոզչության համար նախատեսված միջոցներ:

Իրանի իշխանությունները աղանդավորական նմանօրինակ շարժումները համարում են իսրայելական նախագիծ՝ Իրանի դեմ պայքարելու նպատակով:

Արթին Առաքելյան
«Առաջին» Լրատվական

Wednesday, August 24, 2011

Ահմադինեժադն ամենամեծ վարկաբեկիչներից է


Իրանի նախկին նախագահ Հաշեմի Ռաֆսանջանիի որդին՝ Թեհրանի մետրոյի նախկին գլխավոր տնօրեն Մեհդի Հաշեմի Ռաֆսանջանին իրանական Khabar օրաթերթի հետ հարցազրույցի ընթացքում, անդրադառնալով Ահմադինեժադի ու նրա թիմակիցների գործողություններին, հայտարարել է. «Իմ համոզմամբ՝ Մարերի ժամանակներից մինչև այսօր Ահմադինեժադի նման մարդ չի հայտնվել պատմության մեջ, ով կկարողանար իր մրցակիցներին վարկաբեկելով՝ ժողովրդի վստահությունը շահել: 

Ահմադինեժադն ամենամեծ վարկաբեկիչներից է ու նման է մի մարդու, որ 7 տարի նստած է ճյուղի վրա, ու սեփական շահերի համար սկսել է կտրել նույն ճյուղը, հետո երբ արդեն ճյուղը կոտրվելու շեմին է ու բոլորը քննադատում են իրեն, վայնասուն է բարձրացնում, ասելով «վայ նրանց, որ առանց փաստարկների վարկաբեկում են կառավարությանը»:

Ահմադինեժադի աջակից ԶԼՄ-ները այս տարիներին վարկաբեկեցին Իրանն ու իսլամը և հիմա էլ փորձում են ոչնչացնել ժողովրդի հավատքը: Նրանց գործողությունները արդեն ջրի երես են դուրս եկել, ու եթե երկրի ու հեղափոխության շահերը չլինեին՝ Ահմադինեժադը հաստատ հնարավորություն չէր ստանա իր նախագահության ժամանակաշրջանը ավարտին հասցնել»:

Արթին Առաքելյան
«Առաջին» Լրատվական

Իրանը, Թուրքիան ու Իրաքը համատեղ բանկ են ստեղծում


Իրանական Mehr գործակալության հաղորդմամբ՝ Իրանի համագործակցության գրասենյակի գլխավոր տնօրեն Էբրահիմ Թեհրանին հայտարարել է, որ Իրանը, Թուրքիան ու Իրաքը մտադիր են համատեղ բանկ ստեղծել, որի կենտրոնը Թեհրանում է լինելու:

Թեհրանիի փոխանցմամբ՝ հիշյալ բանկի ստեղծման շուրջ բանակցություններն արդեն սկսել են, ու հավանական է՝ համաձայնության գալուց հետո Իրանի կենտրոնական բանկն էլ այդ բանկի ստեղծման համար իր դրական պատասխանը տա:

Իրանի համագործակցության գրասենյակի գլխավոր տնօրենի մատուցմամբ՝ համատեղ բանկը ոչ-կառավարական է լինելու, և սկզբնական ֆինանսավորումը կատարելու են երեք երկրների ներդրողները:

Արթին Առաքելյան
«Առաջին» Լրատվական

Ալի Աքբար Սալեհին Իրանի միջուկային բանակցություններում սկսել է փոխարինել իրանցի բանագնաց Սայիդ Ջալիլիին


Իրանական Bultan News լրատվական կայքի հաղորդմամբ՝ Իրանի միջուկային աշխատանքների շուրջ վերջին շրջանում տեղի ունեցած բանակցություններն ապացուցում են, որ Իրանի ԱԳ նախարար Ալի Աքբար Սալեհին դանդաղորեն սկսել է փոխարինել Իրանի բանագնաց, Իրանի ազգային անվտանգության խորհրդի քարտուղար Սայիդ Ջալիլիին:

Կայքի փոխանցմամբ՝ ԵՄ անդամ երկրները, երբ հանդիպել են Սայիդ Ջալիլիի նման ուժեղ բանագնացի, որտեղ վերջինս անսասան պաշտպանում է Իրանի ազգային շահերը, փորձում են այսուհետ միջուկային խնդիրների շուրջ ընթացող բանակցությունները վարել Սալեհիի հետ, ու իրենց կողմից հրապարակված նամակներում վերջինիս ուղղել իրենց հարցերը:

Ըստ երևույթին, Ահմադինեժադն էլ անուղղակի կողմնակից է այդ փոփոխությանը, որովհետև ազգային անվտանգության քարտուղարը նշանակվում է երկրի առաջնորդի կողմից, ու բանակցությունները ընթանում են Այաթոլլահ Խամենեիի ցուցումներով, իսկ եթե ԱԳ նախարարը փոխարինի Ջալիլիին, այդ դեպքում հիշյալ բանակցությունները կանցնեն նախագահի վերահսկողության տակ:

Ամիսներ առաջ, երբ Իրանի նախագահը ԱԳ նախկին նախարար Մութաքիին պաշտոնից ազատելով, նախարար նշանակեց Իրանի ատոմական էներգիայի կազմակերպության նախագահ Ալի Աքբար Սալեհիին, փորձագետների մեծ մասը համոզված էր, որ Ահմադինեժադը ցանկանում է միջուկային բանակցությունները իր վերահսկողության տակ առնել:

Արթին Առաքելյան
«Առաջին» Լրատվական

Իրանցի բարձրաստիճան հոգևորականը քննադատեց Թուրքիայի որդեգրած դիրքորոշումները


Իրանական Rasa News լրատվական կայքի հաղորդմամբ՝ Իրանի բարձրաստիճան հոգևոր առաջնորդներից՝ Այաթոլլահ Մաքարեմ Շիրազին, անդրադառնալով վերջին շրջանում Սիրիայի հանդեպ Թուրքիայի որդեգրած դիրքորոշումներին, հայտարարել է. «Մենք Թուրքիայից չէինք սպասում, որ գաղութարարների հետ համամիտ դառնա ու ամբողջությամբ ծառայի նրանց: Սիրիան գաղութարարների հիմնական թիրախում է հայտնվել: Արևմտյան երկրները զինամթերք են վաճառում զինյալ ընդդիմադիրներին: Արդյո՞ք Թուրքիան պիտի միանա գաղութարարներին ու գործի Սիրիայի դեմ:

Թուրքիայի իշխանությունները պիտի լավ իմանան, որ եթե իրենց հարևան երկիրը վնասվեց, այդ վնասը վարակելու է նաև Թուրքիային ու Լիբանանին:»

Արթին Առաքելյան
«Առաջին» Լրատվական

Իրանը պատժում է ՀԱՄԱՍ-ին


«Ազատություն» ռ/կ –ի պարսկերեն ծառայության հաղորդմամբ՝ Իրանի իշխանությունները փորձում են պատժել իսլամական ՀԱՄԱՍ խմբակցությանը՝ Սիրիայի հանդեպ որդեգրած դիրքորոշումների պատճառով:

Արևմտյան մի դիվանագետ, որը բացահայտվել չի ցանկացել, հայտնել է, որ վերջին հետազորությունների արդյունքում պարզվել է, որ Իրանի իշխանությունները կասեցրել են ՀԱՄԱՍ-ին ցուցաբերած իրենց ֆինանսական աջակցությունները: 

Ըստ հիշյալ աղբյուրի՝ դրա գլխավոր դրդապատճառն այն է, որ ՀԱՄԱՍ խմբակցության ղեկավարությունը, որի կենտրոնը գտնվում է Դամասկոսում, չի աջակցել Սիրիայի նախագահ Բաշար Ասադի վարչակարգին:

«Ազատություն» ռ/կ –ի փոխանցմամբ՝ ՀԱՄԱՍ խմբակցությունն անցյալ ամսվա ընթացքում չի հաջողել Գազայի հատվածում իր կառավարության 40 հազար աշխատակիցների աշխատավարձերը վճարել: ՀԱՄԱՍ-ի առաջնորդները նախօրոք հայտարարել էին, որ չվճարված աշխատավարձերը օգոստոս ամսում վճարվելու են, որը մինչ օրս չի իրականացվել:

Փորձագետների համոզմամբ՝ Իրանի իշխանությունները փորձում են այդ միջոցով պատժել ՀԱՄԱՍ խմբակցությանը ու պարտադրել աջակցել Սիրիայի գործող վարչակարգին:

Արթին Առաքելյան
«Առաջին» Լրատվական

«Եթե Իրանը շարունակի հարվածել PJAK-ին, մենք պարտավոր ենք այլ կերպ պատասխանել նրանց». Մուրադ Քարաըլան


BBC հեռուստաընկերության պարսկերեն ծառայությունը հարցազրույց է ունեցել PKK-ի փաստացի ղեկավար Մուրադ Քարաըլանի հետ:

Քարաըլանը հարցազրույցի ընթացքում հայտարարել է, որ PJAK-ը առանձին կուսակցություն է, և ուղղակի նրանց գաղափարախոսությունը մոտ է PKK-ի գաղափարներին: Այս երկու կուսակցություններն առանձին ղեկավարություն ունեն:

Ըստ Քարաըլանի. «Այսօր իրանական կողմը ենթադրում է, որ PJAK-ը PKK-ի մասնաճյուղերից է ու հետևաբար մեզ հետ է բանակցության մեջ մտնում: Մենք բազմաթիվ անգամ PJAK-ի ղեկավարությանը հորդորել ենք, որ զինյալ պայքարի փոխարեն քաղաքական պայքարը որդեգրեն, բայց Իրանի հարվածների արդյունքում նրանք չեն համաձայնում իրենց զենքերը վայր դնել:
Եթե Իրանը վերջ դնի իր ռմբակոծումներին ու չհարվածի PJAK-ին, մենք էլ կկարողանանք վերջիններիս համոզել, որ հեռանան Իրանի սահմանից ու քաղաքական պայքար որդեգրեն:

Մենք երեբեք չենք պայքարել Իրանի դեմ, բայց եթե Իրանը շարունակի իր զինյալ գործողությունները PJAK-ի դեմ, կպարզվի, որ նրանք նաև պայքարում են մեր դեմ, ու մենք պարտավոր ենք այլ կերպ պատասխանել Իրանին»:

Արթին Առաքելյան
«Առաջին» Լրատվական

Monday, August 22, 2011

Թեհրանի քաղաքապետ Ղալիբաֆը Իրանի 11-րդ նախագահն է


Ահմադինեժադի թիմակիցներին պատկանող Mahramane Online լրատվական կայքի հաղորդմամբ՝ Թեհրանի ներկա քաղաքապետ Ղալիբաֆը Իրանի հաջորդ՝ 11-րդ նախագահն է դառնալու:
Ըստ Mahramane Onlin-ի՝ «Ղալիբաֆը այժմ մի դիրում է, որտեղ կարող է երկրի քաղաքականությունը իր ազդեցության տակ պահել, ու դրական փոփոխություններ առաջացնել երկրի ու ժողովրդի համար:
Նա նախ շատ ճանաչված ու գեղեցիկ մարդ է, որի պատճառով է բոլորի ուշադրության կենտրոնում է հայտնվել: Երկրորդ, նա մի անհատականություն ունի, որը անգամ ռեֆորմիստների սիրտն էլ գրավել է: Եվ երրորդը, նա իսլամական հանրապետության պատմության ընթացքում կրկնվող պետական այրերի ցանկում չի եղել, որի համաձայն էլ, նա հնարավորություն ունի որպես նախագահ ընտրվել:»
Կայքը վերջում նաև մի խորհուրդ է տվել Ղալիբաֆի քննադատողներին, ասելով, որ Ղալիբաֆը խիստ սիրված է իրանցիների կողմից, ուրեմն նրա հետ դեմհանդիման լինելուց առաջ զգուշացեք:
Այս բոլորից հետո, Ղալիբաֆին պատկանող լրատվական կայքերից Shafaf-ը հաղորդել է, որ Ահմադինեժադի թիմակիցները, Ռահիմ Մաշայիի գլխավորությամբ, թեհրանի քաղաքապետ Ղալիբաֆին վարկաբեկելու նպատակով, ոչ-պատշաճ արտաքին ունեցող կանանց է օգտագործում, որտեղ այդ կանայք քաղաք դուրս գալով գովազդում են քաղաքապետին:

Արթին Առաքելյան
«Առաջին» Լրատվական

«Մեծ Բրիտանիայի հետ հարաբերությունների խզումը այս պահին նպատակահարմար չէ». Իրանի խորհրդարանի նախագահության անձնակազմի անդամ


Իրանական Nasim Online լրատվական կայքի հաղորդմամբ՝ Իրանի խորհրդարանի նախագահության անձնակազմի անդամ Հոջաթոլիսլամ Հուսեյն Սոբհանինիան հայտարարել է. «Իրանի անվտանգության ծառայությունների հատուկ նկատառումների պատճառով այս պահին Մեծ Բրիտանիայի հետ հարաբերությունների խզումը նպատակահարմար չէ, և դրա փոխարեն հնարավոր է, որ հարաբերությունները Լոնդոնի հետ հասնեն նվազագույնի:

Թեև այդ մասին արդեն համաձայնություն է եղել պաշտոնյաների միջև, բայց հարաբերությունների խզումը պահանջող պատգամավորները պիտի այս նախագիծը քննարկեն ու իրենց առաջարկները ներկայացնեն խորհրդարանի նախագահությանը»։

Արթին Առաքելյան
«Առաջին» Լրատվական

Իրանի պահակազորը զգուշացրեց Իրաքի քրդերին


Իրանական IRIB գործակալության հաղորդմամբ՝ Իրանի պահակազորի ցամաքային ուժերի հրամանատար, գնդապետ Ահմադինին, իրանցի ու միջազգային լրագրողներին տված մամլո ասուլիսի ընթացքում, պատասխանելով Al Jazeera հեռուստաընկերության լրագրողի այն դիտարկմանը, թե միջազգային ԶԼՄ-ները արտացոլել են Իրանի կողմից քրդական գյուղերի ռմբակոծությունները, հայտարարել է. «Իրանի պահակազորի գործողությունները քրդական PJAK խմբակցության դեմ եղել են հստակ ու ճշգրիտ, մեր նպատակը սահմանագծում կայունություն հաստատելն է:
Իրանի կողմից արձակված ցանկացած փամփուշտ ուղղված է եղել PJAK-ի կենտրոնների վրա և ոչ այլուր: Մենք տեղեկություններ ունենք, որ հենց այդ ահաբեկիչներն են, որ այրում են դաշտերը ու, սարսափ առաջացնելով, դատարկում են գյուղերը գյուղացիներից:
Մենք Իրաքի քուրդ ժողովրդից ակնկալում ենք, որ իրենց ճամփան անջատեն ահաբեկիչներից և թույլ չտան, որ ահաբեկիչներն ազատ երթևեկեն իրենց շրջաններում, որովհետև դա անընդունելի է»:

Արթին Առաքելյան
«Առաջին» Լրատվական

Թեհրանը մտահոգված է Ադրբեջանի տարածքից կատարվող՝ Իսրայելի հավանական հարձակումներից


United Press International գործակալության հաղորդմամբ՝ Իրանը խիստ մտահոգված է Ադրբեջանի տարածքից կատարվող Իսրայելի հավանական հարձակումներից: Օրեր առաջ Իրանի իսլամական հեղափոխության պահակազորի հրամանատար Ֆիրուզաբադիի հնչեցրած քննադատությունները Ադրբեջանի իշխանությունների հասցեին, ապացուցում են, որ Իրանը մտահոգվում է Ադրբեջանի ու Իսրայելի զարգացող համագործակցությունից:

Գործակալության համաձայն՝ Իսրայելը Ադրբեջանի հետ հետախուզական ու ռազմական սերտ հարաբերություններ է սահմանել, որի արդյունքում մեծ քանակությամբ զինամթերք ու անօդաչու ինքնաթիռներ է վաճառել Բաքվի իշխանություններին, որի դիմաց էլ թույլտվություն է ստացել Ադրբեջան-Իրան սահմանագծում տեղադրել իր հետախուզական սարքավորումները:

United Press International-ի մատուցմամբ՝ օգոստոսի 9-ին իրանցի հրամանատար Հասան Ֆիրուզաբադիի հնչեցրած անսովոր քննադատությունները ապացուցում են Իսրայելի ու Ադրբեջանի իշխանությունների միջև առկա համագործակցությունների զարգացումն ու միաժամանակ՝ իրանական կողմի մտահոգությունները:

Արթին Առաքելյան
«Առաջին» Լրատվական

Thursday, August 18, 2011

Քրդական PJAK խմբակցությունը պատրաստվում և զինվում է Հայաստանում. Իրանի սահմանապահ գնդի հրամանատար


Իրանական Mehr գործակալության հաղորդմամբ՝ Իրանի Մաքու քաղաքի սահմանապահ գնդի հրամանատար, գնդապետ Ազիզ Հասան Էղդամը հայտարարել է, որ քրդական PJAK խմբակցության զինյալները, պարտվելով իրանի Արևմտյան Ատրպատական նահանգի հարավային շրջաններում, այժմ անցել են նահանգի հյուսիսային շրջաններում գտնվող Բորալան շրջան:

Ըստ գնդապետ Էղդամի՝ «Այժմ իրանի հյուսիսարևելյան սահմանները անվտանգ են, ու PJAK-ի զինյալները երթևեկում են Բորալանի շրջանում, նրանք հստակ կենտրոն չունեն ու միշտ տեղափոխվում են: PJAK-ի զինյալները պատրաստվում ու զինվում են Հայաստանի տարածքում:»

Իրանի սահմանապահ ուժերի հրապամանատարի փոխանցմամբ՝ այս պահին 32 անցակետ հսկում են Իրանի հյուսիսարևմտյան սահմանները:

Ինչպես արդեն տեղեկացրել էր «Առաջին լրատվական»-ը, անցյալ ամիս նմանօրինակ մի հայտարարություն էլ հնչել էր Արդաբիլ քաղաքի կրոնապետ Հոջաթոլիսլամ Ամելիի կողմից, ըստ որի՝ PJAK-ի զինյալները գտնվում են Հայաստանում ու, այնտեղ պատրաստվելով, մտնում են Իրանի տարածք:

Արթին Առաքելյան
«Առաջին» Լրատվական

«Մուրադ Քարայըլանի բացակայությունը կասկածելի է». Milliyet


Իրանկաան Asr Iran լրատվական կայքը, վկայակոչելով թուրքական Milliyet օրաթերթը, հաղորդում է, որ քրդական PKK կուսակցության փաստացի ղեկավար Մուրադ Քարայըլանը օգոստոսի 15-ին բացակա է եղել Իրաքի Ղանդիլի շրջանում PKK-ի 27-րդ տարեդարձի տոնախմբությանը:

Milliyat-ի փոխանցմամբ՝ PKK-ի լրատվական կայքը «Օրուհի տարեդարձի» (Օրուհը այն շրջանն էր, որտեղ PKK-ն 1984 թ. օգոստոսի 15-ին իր զինյալ պայքարը սկսեց Թուրքիայի դեմ) մասնակիցների անվանացանկը հրապարակելով, ոչ մի տեղ չի անդրադարձել Մուրադ Քարայըլանի անվանը, որը խիստ կասկածելի է թվում:

Հիշեցնենք, որ օրեր առաջ Իրանի խորհրդարանի ազգային անվտանգության և արտաքին քաղաքականության հանձնաժողովի նախագահ Ալաոլդին Բորուջերդին հայտարարել էր, որ Քարայըլանը ձերբակալվել է Իրանի անվտանգության ուժերի կողմից, բայց ժամեր անց Քարայըլանը, եթեր դուրս գալով, հերքել էր իր ձերբակալության մասին շրջանառվող լուրերը:

Արթին Առաքելյան
«Առաջին» Լրատվական

Իրանի Քերման քաղաքում պատմական մի եկեղեցի է ոչնչացվել (լուսանկարներ)


Իրանական Mehr գործակալության հաղորդմամբ՝ Քերման քաղաքում գտնվող պատմական եկեղեցին, որը հայտնի է եղել հենց «Քերմանի եկեղեցի» անվամբ, քաղաքաշինության աշխատանքների արդյունքում լիովին ոչնչացվել է՝ բուլդոզերների միջոցով: Եկեղեցին կառուցվել էր 1941 թվականին, նրա հեղինակն էր իրանցի հանրահայտ ճարտարապետ Ալի Մուհամադ Ռավարին: Գիտնականների համոզմամբ՝ եկեղեցու ճարտարապետությունը շատ յուրահատուկ էր, որի պատճառով էլ այն գրանցվել էր Իրանի ազգային ժառանգության ցանկում: Արդեն 32 տարի է, ինչ եկեղեցին չէր գործում, ժամանակին շրջանի հողագործները շենքն օգտագործել են որպես պահեստ, իսկ քաղաքի ընդարձակման հետ՝ այն վերածվել էր տաքսի-սերվիսի:

Արթին Առաքելյան
«Առաջին» Լրատվական

Առնչվող լուսանկարներ






















Twitter Delicious Facebook Digg Stumbleupon Favorites More

 
Բլոգը պատրաստել է Արթին Առաքելյանը