Sunday, August 07, 2011
Artin Arakelian
Իրանական Fars գործակալության հաղորդմամբ՝ Իրանի խորհրդարանը, ի վերջո, վստահության քվե տվեց Ահմադինեժադի ներկայացրած 4 նախարարներին, և այդկերպ Իրանի կառավարության կազմը համալրվեց 4 նորընտիր նախարարով:
Ինչպես արդեն տեղեկացրել է «Առաջին լրատվականը», Իրանի կառավարությունը 6 նախարարություններ միաձուլել է և ստեղծել երեք նոր նախարարություն: Այդ ընթացքում նաև նավթի նախարարությունն էր առանց նախարարի մնացել, հետևաբար նախագահը պիտի 4 նախարարի թեկնածու ներկայացներ Իրանի խորհրդարան վստահության քվե ստանալու նպատակով:
Իրանի նախագահ Մահմուդ Ահմադինեժադը խորհրդարանին էր ներկայացրել հետևյալ թեկնածուներին. Շեյխոլիսլամին՝ համագործակցության, աշխատանքի և հանրային բարեկեցության նախարարության համար, Մեհդի Ղազանֆարիին՝ արդյունաբերության, հանքի և առևտրի նախարարության համար, Ռոսթամ Ղասեմիին՝ նավթի նախարարության և Աբասիին՝ սպորտի և երիտասարդության նախարարությունների համար:
Իրանական լրատվական գործակալությունների փոխանցմամբ՝ ներկայացված երեք նախարարները դյուրությամբ վստահության քվե ստացան երկրի խորհրդարանից, իսկ նավթի նախարարի տեղի համար ներկայացված Ռոսթամ Ղասեմիի շուրջ խորհրդարանում բազմաթիվ վեճեր ծագեցին:
Ռոսթամ Ղասեմին Իրանի պահակազորին պատկանող Խաթամոլանբիա ճամբարի հրամանատարն է, որին որպես նախարար ներկայացնելու փաստը, պահպանողականների կողմից դիտվում է որպես նախագահի տուրքը պահակազորին: Բայց բուռն վեճերի արդյունքում Ղասեմին էլ վստահության քվե ստացավ և մեկնեց նավթի նախարարություն:
Հիշեցնենք, որ Ռոսթամ Ղասեմին ընդգրկված է Արևմուտքի «պատժամիջոցների ցուցակում» և մի շարք երկրներ մուտքի իրավունք չունի:
Արթին Առաքելյան
«Առաջին» Լրատվական
0 Պատգամ:
Post a Comment