Wednesday, February 02, 2011
Artin Arakelian
Նիդերլանդների հեռուստաընկերության News Over հաղորդման ընթացքում բացահայտվել է, որ Իրանում մահապատժի ենթարկված Զահրա Բահրամին 2003 թվականին Կարիբյան կղզիներից Հոլանդիա ներմուծած 16 կգ կոկաին տեսակի թմրանյութի մաքսանենգության մեղադրանքով դատապարտվել էր 3 տարվա ազատազրկման: Նրան նաև 2007-ին մեղադրել էին կեղծ անձնագրեր պատրաստելու համար:
«Ազատություն» ռ/կ-ի պարսկերեն ծառայության հաղորդմամբ, Նիդերլանդների ԱԳ նախարար Ուրի Ռոզենթալը, անդրադառնալով News Over հաղորդաշարի բացահայտումներին, հայտարարել է.
«Այդ բացահայտումները չեն ազդում Իրանում Բահրամիի դատական գործընթացի ու դրա արդյունքում կայացրած դատավճռի վրա: Միակ խնդիրը, որը մեզ հուզում է, Իրանում Բահրամիի դատական գործընթացն է:
Մեզ համար պարզ չէ, թե նրա դատական գործընթացը ինչպես է ընթացել: Նրա դատական նիստերին ո՛չ փաստաբաններ են եղել, ո՛չ էլ Իրանում մեր դեսպանատան պաշտոնյաներին են թույլատրել ներկա գտնվել դատարանում: Ի վերջո, այդ դատական գործողությունը միայն ծիծաղելի ներկայացում էր Իրանի կողմից»։
Իրանական ծագումով Հոլանդիայի քաղաքացի Զահրա Բահրամին 2009-ին իրանական նախագահական ընտրություններից հետո տեղի ունեցած բողոքի ցույցերի ընթացքում ձերբակալվեր էր: Հետո նրան մեղադրեցին թմրանյութեր պահելու և վաճառելու մեջ, և, ի վերջո, Բահրամին հունվարի 29-ին Իրանում մահապատժի ենթարկվեց:
Արթին Առաքելյան
«Առաջին» Լրատվական
0 Պատգամ:
Post a Comment