Monday, June 06, 2011
Artin Arakelian
Ինչպես արդեն տեղեկացրել է «Առաջին լրատվական»-ը, Իրանի առաջնորդի ներկայացուցիչ այաթոլլահ Աբդոլնաբի Նամազին օրեր առաջ հայտարարել էր, որ երկրի նախագահի թիմակիցները ձերբակալվել են հենց Իրանի առաջնորդ այաթոլլահ Խամենեիի հրամանով: Նա նաև մեջբերել էր Ահմադինեժադի մի հայտարարությունը, թե նախագահական ընտրություններում այաթոլլահ Խամենեիի աջակցությունն իրենից մոտ 10 միլիոն քվե է խլել: Մի խոսքով, առաջնորդի հովանավորությունը, ըստ Ահմադինեժադի, գործել է ի վնաս իրեն:
Նամազիի հայտարարությունից հետո Իրանի առաջնորդի, պահակազորի հանրային կապերի ու նախագահի գրասենյակները անմիջապես հերքեցին Նամազիի հնչեցրած հայտարարությունը: Հատկանշական է, որ Նամազիի հիշյալ հայտարությունից ժամեր անց նրա անձնական կայքը շարքից դուրս եկավ և անհասանելի դարձավ բոլորի համար:
Իսկ այաթոլլահ Նամազին այս շաբաթվա ուրբաթօրյա նամազի ընթացքում կրկին հաստատել է իր նախորդ հայտարարություններն ու ավելացրել. «Կրոնապետին սուտ ցուցմունքի մեջ մեղադրելը օրենքին դեմ է, և նման հանցանք գործողները, ըստ շարիաթի, արժանի են մտրակվելու: Ես Իմամ Խոմեյնիի մահվան տարելիցի միջոցառումների ավարտից հետո այդ մասին իմ բողոքը կներկայացնեմ երկրի առաջնորդին»։
Ի դեպ, սա աննախադեպ է Իրանի համար, երբ երկրի առաջնորդը հերքում է ինչ-որ հայտարարություն, իսկ հայտարարություն կատարած անձը կրկին շեշտում է իր խոսքերի ճշմարտացիությունը:
Արթին Առաքելյան
«Առաջին» Լրատվական
0 Պատգամ:
Post a Comment