Wednesday, May 04, 2011
Artin Arakelian
UNESCO-ի, ԱՄՆ պետքարտուղարության և ավելի քան 30 ՀԿ-ների համատեղ ջանքերով, մայիսի 3-ին Վաշինգտոնում կայացավ մամուլի ազատության միջազգային օրվան նվիրված շնորհանդեսը:
Միջոցառման ընթացքում մամուլի ազատության «Գիլերմո Կանո» մրցանակը շահեց իրանցի քաղբանտարկյալ լրագրող Ահմադ Զեյդաբադին:
Զեյդաբադին ազատազրկված լինելու պատճառով բացակա էր հիշյալ միջոցառումից ու բավարարվել էր միայն իր պատգամը կազմակերպիչներին ուղղելով:
Զեյդաբադին իր պատգամում նշել է. «Իրանի հեղափոխական դատարանն ինձ դատապարտել է 6 տարվա ազատազրկման, 5 տարի աքսորի ու ցմահ զրկել քաղաքական, հասարակական ու լրագրողական ակտիվությունից: Ուրեմն, իմ յուրաքանչյուր պատգամը միայն ավելացնելու է իմ և ընտանիքիս ցավերը:
Այդ մրցանակը, որը շնորհվել է իմ երկրի բոլոր քաղբանտարկյալներին ու աքսորված գործակիցներին, նվիրում եմ իմ կնոջն ու զավակներին, ովքեր ավելի քան 10 տարի վախի ու սարսափի մեջ են ապրել: Այդ պարգևը ես նվիրում եմ այն մայրերին, որոնց զավակներն այլևս տուն չեն վերադարձել, և այն կանանց ու զավակներին, ովքեր իրենց սիրելիների բացակայության պատճառով ամեն օր արցունք են թափում»։
Հիշեցնենք, որ Ահմադ Զեյդաբադին Իրանի նախագահական վերջին ընտրություններից հետո ձերբակալվել է ու դատապարտվել 6 տարվա ազատազրկման և 5 տարվա աքսորի: Դատարանը նաև նրան ցմահ արգելել է ցուցաբերել քաղաքական, հասարակական ու լրագրողական ակտիվություն:
Արթին Առաքելյան
«Առաջին» Լրատվական
0 Պատգամ:
Post a Comment