Երկու տարուց Իրանի առաջնորդը կենդանի չի լինի. Ահմադինեժադի գրասենյակի ղեկավար

«Ազատություն» ռ/կ-ի պարսկերեն ծառայության հաղորդմամբ, Իրանի բանիմացների խորհրդի անդամ և Քաշան քաղաքում Իրանի առաջնորդ Այաթոլլահ Խամենեիի ներկայացուցիչ այաթոլլահ Աբդոլնաբի Նամազին հայտարարել է, որ Իրանի նախագահ Մահմուդ Ահմադինեժադի գրասենյակի ղեկավար Էսֆանդյար Ռահիմ Մաշային մի հանդիպման ընթացքում հայտնել է, թե երկու տարի հետո Իրանի առաջնորդ Այաթոլլահ Խամենեին և Իրանի պահապան խորհրդի նախագահ այաթոլլահ Ահմադ Ջանաթին այլևս կենդանի չեն լինելու, որ կարողանան իրեն զրկել նախագահական ընտրություններին որպես թեկնածու առաջադրվելուց:

Այաթոլլահ Նամազին, շարունակելով իր խոսքը, խոսել է կառավարության մեջ ներթափանցած մոլորվածների ու շեղվածների մասին և մատնանշել. «Այսօր Ռահիմ Մաշային համակարգի ուժային բոլոր կառույցներն իր ղեկավարության տակ է առել: 

Իրանի պահակազորի հրամանատար Ջաֆարին Այաթոլլահ Խամենիի հետ ունեցած զրույցում ասել է նրան՝ թույլ տվեք Մաշայիին ձերբակալենք, և այս բոլոր խնդիրները կավարտվեն: Բայց Իրանի առաջնորդը կարծես դեռ այդ կարծիքին չէ և հրամայել է նրանց բոլոր թիմակիցներին ձերբակալել ու լրջորեն հարցաքննել, բայց նաև մատնանշել է, որ երկրի նախագահին այդ խմբից առանձին պահեն»։

Նամազին, կրկին անդրադառնալով նախագահի գրասենյակի ղեկավարի շուրջը ծայր առած խնդիրներին, մեջբերել է Ռահիմ Մաշայիի մի նախադասությունը, ըստ որի՝ Մաշայիին հայտնել են, որ եթե ցանկանում է նախագահական ընտրություններին որպես թեկնածու առաջադրվել, նրա իրավասությունը չի հաստատվի պահապան խորհրդի նախագահ այաթոլլահ Ջանաթիի կողմից: Մաշային իր զրուցակցին պատասխանել է. «Երկու տարի հետո ոչ Ջանաթին է լինելու, ոչ էլ Այաթոլլահ Խամենեին, որ փորձեն ինձ զրկել նախագահական ընտրություններին առաջադրվելուց»։

Հատկանշական է, որ Այաթոլլահ Նամազիի բացահայտումները նախ հրապարակվել են նրա անձնական կայքում՝ www.safirevelaayat.ir, իսկ մի քանի ժամ անց նրա կայքը շարքից դուրս է եկել ու այլևս անհասանելի է դարձել:

Արթին Առաքելյան

«Առաջին» Լրատվական