Friday, June 03, 2011
Artin Arakelian
Իրանի կառավարության օրգան IRAN օրաթերթը իր հրապարակած խմբագրականում ակնհայտորեն ընդդիմանում է Իրանի Իսլամական Հանրապետության հիմնադիր Իմամ Խոմեյնիի գաղափարներին:
IRAN օրաթերթի ղեկավար Ալի Աքբար Ջավանֆեքրը, որը համարվում է նախագահ Ահմադինեժադի թիմի պարագլուխներից, իր խմբագրականում նշել է, թե Իմամ Խոմեյնիի կողմից արտահայտած «Խորհրդարանը բոլոր իրադրությունների ղեկն է» գաղափարը ժամանակավրեպ է, և այս պահին բոլոր իրադրությունների ղեկը համարվում է կառավարությունը:
Ըստ Ջավանֆեքրի՝ «Երբ Իմամ Խոմեյնին ասել էր, թե խորհրդարանն է բոլոր իրադրությունների ղեկը, այն ժամանակ խորհրդարանի կողմից ընտրված վարչապետն էր գլխավորում երկրի գործադիր իշխանությունը: Բայց երբ վերանայվեց երկրի սահմանադրությունը, և վարչապետության պաշտոնը հանվեց սահմանադրությունից, գործադիր իշխանությունը գլխավորեց ժողովրդի քվեներով ընտրված նախագահը: Ուրեմն, խորհրդարանը այլևս իրադրությունների ղեկը չէ»։
Պիտի ավելացնենք, որ Իրանի իսլամական հեղափոխության հաղթանակից հետո համակարգի հիմնադիր Իմամ Խոմեյնին, նախկին վարչակարգի դրվածքը քննադատելով, հայտարարեց, որ ժողովրդի ներկայացուցիչ համարվող խորհրդարանն է, որ երկրի բոլոր իրադրությունների ղեկն է, և բոլորը պետք է հաշվի նստեն ժողովրդի ներկայացուցիչների հետ:
Իսկ Մահմուդ Ահմադինեժադի պաշտոնավարության տարիներին բազմիցս փորձ է արվել երկրի նախագահի պաշտոնը խորհրդարանից ավելի բարձր դասել:
Արթին Առաքելյան
«Առաջին» Լրատվական
0 Պատգամ:
Post a Comment